Piyada yolunu keçən bir insan bir neçə dəqiqə sonra maşının altında qalıb öləcəyindən və ya ömür boyu şikəst qalacağından xəbərsizdir. Həkimə gedən bir insan orqanlarının xərçəng hüceyrələri ilə əhatə olunduğundan xəbərsizdir. Dünyaya yeni göz açmış bir körpə bir neçə dəqiqə sonra mələklər tərəfindən cənnətə aparılacağından xəbərsizdir. Sakit və rahat bir şəkildə kresloda oturan insan bir saniyə sonra infarkt keçirərək ürəyinin dayanacağından xəbərsizdir. Ağlı tamamilə fərqli düşüncələrlə dolu olan bir ailə yeməkdən qayıdarkən yolda qəza keçirib, bir addım sonra ölümlə qarşılaşacağından xəbərsizdir...

Ölüm budur; nə yaş dinləyər, nə şan-şöhrət, nə gənclik, nə də pul. Əgər insanın əcəli gəlibsə, vaxtı çatıbsa, heç kim ölüm mələklərini dayandıra bilməz. Çünki mələklər Rəbblərinə boyun əyərək əmr olunduqları işi yerinə yetirər və gəlib o insanın canını alarlar. Dünyada bu qədər qürurlanan, özünü uca tutan, saatlarla lazımsız şeylər barəsində fikirləşən insan əslində necə də acizdir. Çünki bir addım sonra tamamilə fərqli bir dünyaya köçəcəyindən, dünya ilə bir daha heç cür əlaqə yarada bilməyəcəyindən xəbərsizdir. Özünə dərd etdiyi şeylər bu dünyada qalacaq, o isə sonsuz axirət həyatına qədəm qoyacaqdır.

(Can) boğaza yetişdiyi (ölüm gəlib çatdığı) zaman Siz (ona) baxıb durursunuz .Biz ona sizdən daha yaxınıq, amma siz görmürsünüz. (Vaqiə surəsi, 83-85)
Çox böyük bir hikmətlə dünyadakı heç bir insan əcəlini, yəni ölüm anını bilməz və təxirə sala, önə çəkə və ya bir neçə il sonraya saxlaya bilməz. Çünki Allah yaratdığı hər insanın qədərində bir ölüm vaxtı müəyyən etmişdir. Qədər hər gün, bütün xırdalıqları ilə işləyər, insan rahat şəkildə həyatına davam edər, gündəlik işləri ilə məşğul olar, dostları ilə söhbət edər, gülər, yeyər, içər, əylənər. Halbuki o gün, bəlkə də, dünyada yaşayacağı son gündür. O gündən sonra dünya həyatı ilə əlaqəsi sonsuza qədər kəsiləcək, dünyada nə varsa, geridə qalacaqdır.

Sizin aranızda ölümü Biz müəyyən etdik və heç nə Bizim qarşımızı ala bilməz. (Vaqiə surəsi, 60)

Harada olursunuzsa olun, ölüm sizi haqlayacaq. Hətta yüksək qalalarda olsanız belə. Onlara bir yaxşılıq üz verdikdə: “Bu, Allah`dandır!”– deyər, bir pislik üz verdikdə isə: “Bu, səndəndir!”– deyərlər. De: “Hamısı Allah`dandır!” Bu adamlara nə olub ki, az qala söz də anlamırlar? (Nisa surəsi, 78)

Nəticədə hər insan öləcək yaşdadırsa, deməli, insan ölümü heç vaxt unutmamalıdır, elə deyilmi? Çünki biz yatarkən, yolda yeriyərkən, bir işlə məşğul olarkən, söhbət edərkən ölüm mələkləri ən yaxınımızda bizi gözləyir. Biz onları görə, eşidə bilmirik, amma onlar bizi görürlər və etdiyimiz hər şeyi qeyd edirlər. Əgər ölən insan həyatını imanla keçiribsə, saleh əməlləri ilə, ibadətləri ilə, səbir etdikləri ilə, təvəkkülü ilə əməl dəftərini doldurubsa, Allah üçün yaşayıb, Allah üçün ölübsə, məhz o zaman mələkləri ən gözəl şəkildə görəcək və cənnətlə müjdələnəcəkdir. Onun üçün artıq heç bir qorxu olmaz, çünki artıq sonsuza qədər Allah’ın razı olduğu cənnət əhlindən olur.

“O kəslər ki, mələklər onların canını gözəl tərzdə alıb deyirlər: “Sizə salam olsun! Əməllərinizə görə Cənnətə girin!” (Nəhl surəsi, 32)

Əgər ölüm bir addım yaxınlığındadırsa, insan sadəcə bir gününü deyil, bir dəqiqəsini, bir saniyəsini də boşuna keçirməməlidir. Oyandığı hər  səhər möminin yeni savablar qazanmağı üçün Allah tərəfindən verilən çox gözəl bir imkandır. O günü də Allah rizası üçün yaşayacaq, dua etməklə, ibadətlərlə, savablarla və saleh əməllərlə keçirəcəkdir. Gün ərzində göstərdiyi gülərüzlülükdən təvazökarlığa, nəfsini tərbiyə etməsindən hər an göstərdiyi gözəl əxlaqa qədər möminin göstərdiyi hər davranışı çox dəyərlidir. Çünki bunların hamısı həmin andan etibarən sonsuza istiqamətlənir. Mömin dünyada etdiyi bütün yaxşılıqların qarşılığını cənnətdə qat-qat çox alacaq. Dünyada eşqlə, şövqlə infaq (Allah üçün xərcləmək) edər və bir tərəfdən də cənnətin ən gözəl köşkləri onun üçün hazırlanar.

Dünya nəfəs alıb vermək qədər qısadır. O son gün gəlməzdən əvvəl “hər an öləcək yaşda” olduğunu bilmək və bu şüurla yaşamaq ən doğru davranış olar…

Hər bir kəs ölümü dadacaqdır. Şübhəsiz ki, mükafatlarınız qiyamət günü tamamilə veriləcəkdir. Oddan (Cəhənnəmdən) uzaqlaşdırılıb, Cənnətə daxil edilən kimsə muradına çatacaqdır. Dünya həyatı isə aldadıcı həzdən başqa bir şey deyildir. (Ali-İmran surəsi, 185)